Në Bruksel vazhdon dialogu në nivel ekspertësh

0
35

Në Bruksel vazhdon sot dialogu midis Kosovës dhe Serbisë në nivel të ekspertëve.

Në raundet e deritashme të bisedimeve të këtij niveli, që kanë nisur muajin e kaluar, është diskutuar për të pagjeturit, për të zhvendosurit dhe për bashkëpunimin ekonomik.

Kryeministri i Kosovës, Avdullah Hoti, tha të mërkurën se në takimin e sotëm do të diskutohet po ashtu për çështje të bashkëpunimit ekonomik.

Delegacioni i Kosovës në bisedimet e nivelit të ekspertëve udhëhiqet nga koordinatori shtetëror për dialogun, Skender Hyseni, ndërsa ai i Serbisë nga shefi i Zyrës për Kosovën në Qeverinë serbe, Marko Gjuriq.

Burimet diplomatike në Bashkimin Evropian paralajmëruan se në fillim të shtatorit do të mund të zhvillohet edhe një raund i bisedimeve të nivelit të lartë midis kryeministrit të Kosovës, Avdullah Hoti, dhe presidentit të Serbisë, Aleksandar Vuçiq.

Më 4 shtator, ndërkaq, Hoti dhe Vuçiq pritet të takohen në Uashington, me ftesë të këshilltarit për Siguri Kombëtare të SHBA-së, Robert O’Brein.

Bisedimet midis Kosovës dhe Serbisë kanë për synim normalizimin e marrëdhënieve midis dy vendeve.

(evropaelire.org, 27/08/2020)

SHARE