Shënimi i muajit

0
188

Ashtu siç ishin marrë vesh nga fundi i qershorit për intensifikimin e dialogut, brenda më pak se një muaji, më 18 korrik, në Bruksel u takuan përsëri presidenti Hashim Thaçi dhe homologu i tij, Aleksandar Vučić i Serbisë.  Lehtësuesja e dialogut, përfaqësuesja e lartë e BE-së, Federica Mogherini, tha se me këtë rast bashkë me dy presidentët kishin rishikuar “progresin e shënuar në diskutimet rreth kornizës së një marrëveshjeje të detyrueshme ligjore mbi normalizimin e gjithmbarshëm të marrëdhënieve midis të dyja palëve”.

Këtë “rishikim të progresit të shënuar” palët e prezantuan kështu para gazetarëve:

Presidenti Thaçi  tha se “ka qenë një takim i shkurtë. Ka qenë një takim jo i lehtë. Shumë i vështirë. Ndoshta më i shkurti dhe më i rëndi prej të gjitha takimeve që i kemi zhvilluar në këto gjashtë vitet e fundit.” “Por,” shtoi ai, “përkushtimi ynë për të ardhmen evropiane është serioz. Do të punojmë maksimalisht që ta arrijmë marrëveshjen përfundimtare.”

Presidenti Vučić tha se bisedimet gjithsesi nuk ishin të lehta (shumë të komplikuara, i quajti) –  dhe se ishin dy gjëra për të cilat kishin rënë dakord. “Një, që t’i vazhdojmë bisedimet, të përpiqemi të kërkojmë emërues të përbashkët të kompromisit, ndërsa e dyta është që të ruajmë paqen dhe stabilitetin në marrëdhëniet midis Beogradit dhe Prishtinës,” tha Vučić.

Disa ditë më vonë, zëdhënësja e BE-së, Maja Kocijančič, njoftoi se palët kishin rënë dakord po ashtu që takimin e radhës ta zhvillojnë në fillim të shtatorit.

Derisa një muaj më parë kishte qenë delegacioni kosovar ai që kishte refuzuar dialogun teknik, këtë herë, sipas shefit të ekipit negociator të Kosovës, Avni Arifi, një takim i caktuar për 13 korrik nuk ishte mbajtur për shkak se pala serbe kishte anuluar pjesëmarrjen.

Në takimin e nivelit të lartë në Bruksel nga Prishtina shkoi një delegacion i zgjeruar (presidenti, kryeministri, kryetari i parlamentit + tre zëvendëskryeministra), që sipas kryeministrit Ramush Haradinaj, dëshmoi se “institucionet e Kosovës janë unike për dialogun me Serbinë”. Por me ta nuk kishte përfaqësuesë të opozitës dhe përpjekjet për të arritur një konsensus të subjekteve politike në Kosovë rreth dialogut ende nuk kanë dhënë ndonjë rezultat. As debati i inicuar në parlament nuk arriti t’i afroi palët. Kur në Serbi, ndërkaq, po bëhet një vit qëkur presidenti Vučić hodhi idenë për fillimin e dialogut të brendshëm rreth Kosovës, tani po shtrohen pyetje nëse ai është zhvilluar fare meqë nuk kanë dalë kurrfarë konkluzione prej tij.

Gjatë korrikut, Ekipi Menaxhues duhej t’i afrohej fundit të punës së tij në hartimin e Statutit të Asociacionit të komunave me shumicë serbe. Kryeministri Haradinaj tha se priste që drafti të paraqitej në formë propozimi deri më 4 ose 5 gusht, sipas afatit të caktuar nga BE-ja. Vetëm disa ditë më parë, zëdhënësja Kocijančič, tha se puna rreth hartimit të statusit po vazhdonte por do të marrë kohë, dhe kjo u interpretua si zgjatje e afatit. Pas njoftimeve në media në fillim të muajit se qeverisë i ishte dorëzuar projektstatuti, Ekipi Menaxhues njoftoi se nuk ishte fjala për projektstatutin por për një raport mbi punën e tyre të deritashme dhe se projektstatutin do t’ia paraqesin së pari këshillave të implementimit në Bruksel e pastaj edhe në dialogun e nivelit të lartë.

Ndërkohë në terren, në Mitrovicën e veriut ka vazhduar puna te ura e Ibrit, në kuadër të projektit të Bashkimit Evropian. Për të eliminuar disa shqetësime të shprehura,  Inspektorati i Ministrisë së Mjedisit dhe Planifikimit Hapësinor sqaroi se
punimet janë duke u zhvilluar sipas marrëveshjes së arritur në shkurt të vitit të kaluar ndërmjet institucioneve të Kosovës dhe kryetarit të Mitrovicës Veriore Goran Rakiq për rrëzimin e murit, që ishte ndërtuar në dhjetor të vitit 2016 në këtë vend.”

Në një debat publik në Mitrovicë të veriut u tha se edhe më shumë se gjysmë viti pas integrimit të gjyqësisë, gjykatat në veri vazhdojnë të punojnë me kapacitet jo të plotë.

Dhe në atë që u cilësua se ishte hera e parë, përfaqësuesë të Policisë së Kosovës dhe të Policisë së Serbisë zhvilluan një takim të lehtësuar nga zëvendësshefi i misionit të EULEX-it, Bernd Thran. Sipas njoftimit, qëllimi i takimit ishte për të ndihmuar në rritjen e këmbimit të informatave dhe bashkëpunimit midis dy shërbimeve në hetimin e vrasjes së Oliver Ivanović-it. Zoti Thran tha se takimi ishte sfidues por ishte i suksesshëm dhe se të dy shërbimet policore ranë dakord të takohen sërish në fillim të gushtit.

comments

SHARE